‏ Psalms 102

Maombi Ya Mtu Mwenye Taabu

Maombi ya mtu aliyechoka. Anapoteseka na kumimina malalamiko yake kwa Bwana.

1 ^aEe Bwana, usikie maombi yangu,
kilio changu cha kuomba msaada kikufikie.
2 ^bUsinifiche uso wako
ninapokuwa katika shida.
Unitegee sikio lako,
ninapoita, unijibu kwa upesi.

3Kwa kuwa siku zangu zinatoweka kama moshi,
mifupa yangu inaungua kama kaa la moto.
4 ^cMoyo wangu umefifia na kunyauka kama jani,
ninasahau kula chakula changu.
5 ^dKwa sababu ya kusononeka kwangu kwa uchungu,
nimebakia ngozi na mifupa.
6 ^eNimekuwa kama bundi wa jangwani,
kama bundi kwenye magofu.
7 ^fNilalapo sipati usingizi,
nimekuwa kama ndege mpweke
kwenye paa la nyumba.
8 ^gMchana kutwa adui zangu hunidhihaki,
wale wanaonizunguka hutumia jina langu kama laana.
9 ^hNinakula majivu kama chakula changu
na nimechanganya kinywaji changu na machozi
10 ⁱkwa sababu ya ghadhabu yako kuu,
kwa maana umeniinua na kunitupa kando.
11 ^jSiku zangu ni kama kivuli cha jioni,
ninanyauka kama jani.

12 ^kLakini wewe, Ee Bwana, umeketi katika kiti chako cha enzi milele,
sifa zako za ukuu zaendelea vizazi vyote.
13 ^lUtainuka na kuihurumia Sayuni,
kwa maana ni wakati wa kumwonyesha wema;
wakati uliokubalika umewadia.
14 ^mKwa maana mawe yake ni ya thamani kwa watumishi wako,
vumbi lake lenyewe hulionea huruma.
15 ⁿMataifa wataogopa jina la Bwana,
wafalme wote wa dunia watauheshimu utukufu wako.
16 ^oKwa maana Bwana ataijenga tena Sayuni
na kutokea katika utukufu wake.
17 ^pAtaitikia maombi ya mtu mkiwa,
wala hatadharau hoja yao.

18 ^qHili na liandikwe kwa ajili ya kizazi kijacho,
ili taifa litakaloumbwa baadaye waweze kumsifu Bwana:
19 ^r“Bwana alitazama chini kutoka patakatifu pake palipo juu,
kutoka mbinguni alitazama dunia,
20 ^skusikiliza vilio vya uchungu vya wafungwa
na kuwaweka huru wale waliohukumiwa kufa.”
21 ^tKwa hiyo jina la Bwana latangazwa huko Sayuni
na sifa zake katika Yerusalemu,
22 ^uwakati mataifa na falme zitakapokusanyika
ili kumwabudu Bwana.

23 ^vKatika kuishi kwangu alivunja nguvu zangu,
akafupisha siku zangu.
24 ^wNdipo niliposema:
“Ee Mungu wangu, usinichukue katikati ya siku zangu;
miaka yako inaendelea vizazi vyote.
25 ^xHapo mwanzo uliweka misingi ya dunia,
nazo mbingu ni kazi ya mikono yako.
26 ^yHizi zitatoweka, lakini wewe utadumu,
zote zitachakaa kama vazi.
Utazibadilisha kama nguo
nazo zitaondoshwa.
27 ^zLakini wewe, U yeye yule,
nayo miaka yako haikomi kamwe.
28 ^aaWatoto wa watumishi wako wataishi mbele zako;
wazao wao wataimarishwa mbele zako.”