‏ Job 19

Hotuba Ya Sita Ya Ayubu

Ayubu Anajibu: Najua Mkombozi Wangu Yu Hai

1Ndipo Ayubu akajibu:

2 ^a“Je, mtaendelea kunitesa mpaka lini,
na kuniponda kwa maneno yenu?
3 ^bMara kumi hizi mmenishutumu;
bila aibu mnanishambulia.
4 ^cKama ni kweli nimepotoka,
kosa langu ninabaki kuhusika nalo mwenyewe.
5 ^dKama kweli mngejitukuza wenyewe juu yangu,
na kutumia unyonge wangu dhidi yangu,
6 ^ebasi jueni kuwa Mungu amenitendea yaliyo mabaya,
naye amekokota wavu wake kunizunguka.

7 ^f“Ingawa ninalia, ‘Nimetendewa mabaya!’ sipati jibu;
ingawa ninaomba msaada, hakuna haki.
8 ^gYeye ameizuia njia yangu hivyo siwezi kupita;
ameyafunika mapito yangu na giza.
9 ^hAmenivua heshima yangu,
na kuniondolea taji kichwani pangu.
10 ⁱAmenibomoa kila upande hadi nimeisha;
amelingʼoa tegemeo langu kama mti.
11 ^jHasira yake imewaka juu yangu;
amenihesabu kuwa miongoni mwa adui zake.
12 ^kMajeshi yake yananisogelea kwa nguvu;
yamenizingira,
yamepiga kambi kulizunguka hema langu.

13 ^l“Amewatenga ndugu zangu mbali nami;
wale tunaojuana nao wamefarakana nami kabisa.
14 ^mWatu wa jamaa yangu wamekwenda mbali;
rafiki zangu wamenisahau.
15 ⁿWageni wangu na watumishi wangu wa kike wananiona kama mgeni;
wananitazama kama mgeni.
16Namwita mtumishi wangu, wala haitiki,
ingawa namwomba kwa kinywa changu mwenyewe.
17 ^oPumzi ya kinywa changu ni kinyaa kwa mke wangu;
nimekuwa chukizo mno kwa ndugu zangu mwenyewe.
18 ^pHata watoto wadogo hunidhihaki;
ninapojitokeza, hunifanyia mzaha.
19 ^qRafiki zangu wa moyoni wote wananichukia kabisa;
wale niwapendao wamekuwa kinyume nami.
20 ^rMimi nimebaki mifupa na ngozi tu;
nimeponea nikiwa karibu kufa.

21 ^s“Nihurumieni, rafiki zangu, kuweni na huruma,
kwa kuwa mkono wa Mungu umenipiga.
22 ^tKwa nini mnanifuatia kama Mungu afanyavyo?
Hamtosheki kamwe na mwili wangu?

23 ^u“Laiti maneno yangu yangewekwa kwenye kumbukumbu,
laiti kwamba yangeandikwa kwenye kitabu,
24 ^vkwamba yangechorwa kwenye risasi kwa kifaa cha chuma,
au kuyachonga juu ya mwamba milele!
25 ^wNinajua kwamba Mkombozi ▼

▼Au: Mtetezi.

wangu yu hai,
naye kwamba mwishoni atasimama juu ya nchi.
26 ^yNami baada ya ngozi yangu kuharibiwa,
bado nikiwa na mwili huu nitamwona Mungu;
27 ^zmimi nitamwona kwa macho yangu mwenyewe:
mimi, wala si mwingine.
Tazama jinsi moyo wangu unavyomtamani sana!

28“Kama mkisema, ‘Tazama tutakavyomwinda,
maadamu mzizi wa tatizo uko ndani yake,’
29 ^aaninyi wenyewe uogopeni upanga,
kwa kuwa ghadhabu italeta adhabu kwa upanga,
nanyi ndipo mtakapojua kwamba kuna hukumu.”