‏ Numbers 31Summary

1ወነበቦ ፡ እግዚአብሔር ፡ ለሙሴ ፡ ወይቤሎ ፤ 2ተበቀል ፡ በቀሎሙ ፡ ለደቂቀ ፡ እስራኤል ፡ እምነ ፡ መድናውያን ፡ ወድኅረ ፡ ትትዌሰክ ፡ ኀበ ፡ ሕዝብከ ። 3ወነገሮሙ ፡ ሙሴ ፡ ለሕዝብ ፡ ወይቤሎሙ ፡ አስተረስዩ ፡ እምውስቴትክሙ ፡ ዕደወ ፡ ወ[ተቃተ] ሉ ፡ ቅድመ ፡ እግዚአብሔር ፡ ምስለ ፡ ምድያም ፡ ከመ ፡ ያግብኡ ፡ በቀለ ፡ እምኀበ ፡ እግዚአብሔር ፡ ለምድያም ። 4ወ፲፻እምውስተ ፡ ነገድ ፡ ወ፲፻እምውስተ ፡ ነገድ ፡ ወእምውስተ ፡ ኵሉ ፡ ነገደ ፡ እስራኤል ፡ ፈንው ፡ ዘይትቃተል ። 5ወኈለቁ ፡ እምውስተ ፡ አእላፍ ፡ ዘእስራኤል ፡ እምነገድ ፡ ነገድ ፡ ፲፻ወኮነ ፡ እልፈ ፡ ወዕሥራ ፡ ምእተ ፡ እለ ፡ ተረሰዩ ፡ ለቀትል ። 6ወፈነዎሙ ፡ ሙሴ ፡ በበ ፡ ዐሠርቱ ፡ ምእት ፡ ዘነገድ ፡ ነገድ ፡ ምስለ ፡ ኀይሎሙ ፡ ወፊንሕስ ፡ ወልደ ፡ እልዓዛር ፡ ወልደ ፡ አሮን ፡ ካህን ፡ ወንዋየ ፡ ቅድሳት ፡ ወመጣቅዕት ፡ ዘተአምር ፡ ምስሌሆሙ ። 7ወተቃተልዎሙ ፡ ለምድያም ፡ በከመ ፡ አዘዞ ፡ እግዚአብሔር ፡ [ለሙሴ ፡] ወቀተሉ ፡ ኵሎ ፡ ተባዕቶሙ ። 8ወለነገሥተ ፡ ምድያምሂ ፡ ቀተልዎሙ ፡ ኅቡረ ፡ በውእቱ ፡ ቀትሎሙ ፡ ወአውንሂ ፡ ወሮቆምሂ ፡ ወሱርሂ ፡ ወሑርሂ ፡ ወሮቦቅሂ ፡ ኀምስቱ ፡ ነገሥተ ፡ ምድያም ፡ ወለበለዓምሂ ፡ ወልደ ፡ ቤዖር ፡ ቀተልዎ ፡ በኀፂን ፡ በውእቱ ፡ ቀትሎሙ ። 9ወፄወው ፡ አንስቲያሆሙ ፡ ለምድያም ፡ ወንዋዮሙኒ ፡ ወእንስሳሆሙኒ ፡ ወኵሎ ፡ ጥሪቶሙ ፡ ወኀይሎሙ ፡ ፄወው ። 10ወኵሎ ፡ አህጉሪሆሙ ፡ ዘውስቴቱ ፡ ይነብሩ ፡ ወአዕጻዳቲሆሙኒ ፡ አውዐዩ ፡ በእሳት ። 11ወነሥኡ ፡ ኵሎ ፡ ፄዋሆሙ ፡ ወምህርካሆሙ ፡ እምሰብእ ፡ እስከ ፡ እንስሳ ። 12ወወሰዱ ፡ ኀበ ፡ ሙሴ ፡ ወኀበ ፡ እልዓዛር ፡ ካህን ፡ ወኀበ ፡ ኵሉ ፡ ደቂቀ ፡ እስራኤል ፡ ፄዋ ፡ ወምህርካ ፡ ወዘበርበሩ ፡ ውስተ ፡ ትዕይንት ፡ ዘአራ[ቦ] ት ፡ ዘሞአብ ፡ እንተ ፡ ዲበ ፡ ዮርዳንስ ፡ መንገለ ፡ ኢያሪኮ ። 13ወወፅኡ ፡ ሙሴ ፡ ወእልዓዛር ፡ ካህን ፡ ወኵሉ ፡ መላእክተ ፡ ተዓይን ፡ ተቀበልዎሙ ፡ አፍአ ፡ እምትዕይንት ። 14ወተምዐ ፡ መዐተ ፡ ሙሴ ፡ ላዕለ ፡ መላእክተ ፡ ሰራዊት ፡ ወላዕለ ፡ መሳፍንቲሆሙ ፡ ወላዕለ ፡ መላእክትኒ ፡ እለ ፡ አተው ፡ እምፀብእ ፡ እምኀበ ፡ ይትቃተሉ ። 15ወይቤሎሙ ፡ ሙሴ ፡ ለምንት ፡ አሕየውክሙ ፡ ኵሎ ፡ አንስተ ። 16እስመ ፡ እላንቱ ፡ ውእቶን ፡ እለ ፡ ይከውናሆሙ ፡ ለደቂቀ ፡ እስራኤል ፡ በከመ ፡ ይቤ ፡ በለዓም ፡ እለ ፡ ያስሕታሆሙ ፡ ወያኀድጋሆሙ ፡ ቃለ ፡ እግዚአብሔር ፡ በበይነ ፡ ፌጎር ፡ ወመጽአ ፡ መቅሠፍተ ፡ እግዚአብሔር ፡ ላዕለ ፡ ትዕይንት ። 17ወይእዜኒ ፡ ቅትሉ ፡ ኵሎ ፡ ተባዕተ ፡ በኀበ ፡ ሀለው ፡ ወኵሎ ፡ ብእሲተ ፡ እንተ ፡ አእመረት ፡ ብእሴ ፡ ቅትሉ ። 18ወኵሎ ፡ አዋልደ ፡ እለ ፡ ኢያእመራ ፡ ብእሴ ፡ አሕይውዎን ። 19ወአንትሙሰ ፡ ተዓየኑ ፡ ለክሙ ፡ አፍአ ፡ እምትዕይንት ፡ ሰቡዐ ፡ መዋዕለ ፡ ኵሉ ፡ ዘቀተለ ፡ ወዘገሰሰ ፡ ምውተ ፡ ያንጽሕ ፡ ርእሶ ፡ አመ ፡ ሣልስት ፡ ዕለት ፡ ወአመ ፡ ሳብዕት ፡ ዕለት ፡ አንትሙ ፡ ወፄዋክሙ ። 20ወኵሎ ፡ ልብሰ ፡ ወኵሎ ፡ ንዋየ ፡ ማእስ ፡ ወኵሎ ፡ ንዋየ ፡ ዘእምነ ፡ ማእሰ ፡ ጠሊ ፡ ወኵሎ ፡ ንቀየ ፡ ዕፅ ፡ አንጽሑ ። 21ወይቤሎሙ ፡ እልዓዛር ፡ ለዕደወ ፡ ኀይል ፡ እለ ፡ አተው ፡ እምፀብእ ፡ እምኀበ ፡ ይትቃተሉ ፡ ዝንቱ ፡ ውእቱ ፡ ኵነኔሁ ፡ ለሕግ ፡ ዘአዘዞ ፡ እግዚአብሔር ፡ ለሙሴ ። 22ወርቅ ፡ ወብሩር ፡ ወብርት ፡ ወኀፂን ፡ ወዐረር ፡ ወናእክ ፤ 23ኵሉ ፡ ዘይትገበር ፡ በእሳት ፡ ንዋይ ፡ ወይነጽሕ ፡ ለያንጽሕዎ ፡ በማየ ፡ አንጽሖ ፡ ወኵሉ ፡ ዘይበውእ ፡ ውስተ ፡ እሳት ፡ ለይጥምዕዎ ፡ ውስተ ፡ ማይ ። 24ወኅፅቡ ፡ አልባሲክሙ ፡ በሳብዕት ፡ ዕለት ፡ ወትነጽሑ ፡ ወእምድኅረ ፡ ዝንቱ ፡ ትበውኡ ፡ ውስተ ፡ ትዕይንተ ። 25ወነበቦ ፡ እግዚአብሔር ፡ ለሙሴ ፡ ወይቤሎ ፤ 26ንሥኦ ፡ መሠንዮ ፡ ለፄዋ ፡ ወለምህርካ ፡ እምሰብእ ፡ እስከ ፡ እንስሳ ፡ አንተ ፡ ወእልዓዛር ፡ ወመላእክተ ፡ አበዊሆሙ ፡ ለተዓይን ። 27ወትከፍሉ ፡ ምህርካ ፡ ማእከሎሙ ፡ ለእለ ፡ ፀብኡ ፡ ለእለ ፡ ሖሩ ፡ ይትቃተሉ ፡ ወማእከለ ፡ ኵሉ ፡ ተዓይን ። 28ወታወፅኡ ፡ ፀባሕቶ ፡ ለእግዚአብሔር ፡ እምኀቤሆሙ ፡ ለእለ ፡ ፀብኡ ፡ ለእለ ፡ ሖሩ ፡ ይትቃተሉ ፡ አሐተ ፡ ነፍሰ ፡ እምውስተ ፡ ፭፻ወእምነ ፡ ሰብእ ፡ ወእምነ ፡ እንስሳ ፡ ወእምነ ፡ አልህምት ፡ ወእምነ ፡ አባግዕ ፡ ወእምነ ፡ አእዱግ ። 29ወትነሥእ ፡ እምነ ፡ መንፈቆሙ ፡ ወትሁቦ ፡ ለእልዓዛር ፡ ካህን ፡ ቀደምያቲሁ ፡ ለእግዚአብሔር ። 30ወእምነ ፡ መንፈቆሙ ፡ ለደቂቀ ፡ እስራኤል ፡ ትነሥእ ፡ አሐደ ፡ እምኀምሳ ፡ እምነ ፡ ሰብእ ፡ ወእምነ ፡ አልህምት ፡ ወእምነ ፡ አባግዕ ፡ ወእምነ ፡ አእዱግ ፡ ወእምነ ፡ እንስሳ ፡ ወሀቦሙ ፡ ለሌዋውያን ፡ እለ ፡ የዐቅቡ ፡ ሕገ ፡ ደብተራሁ ፡ ለእግዚአብሔር ። 31ወገብረ ፡ ሙሴ ፡ ወእልዓዛር ፡ ካህን ፡ በከመ ፡ አዘዞ ፡ እግዚአብሔር ፡ ለሙሴ ። 32ወኮነ ፡ ኍልቈ ፡ አባግዕ ፡ ዘማህረኩ ፡ ዕደው ፡ እለ ፡ ፀብኡ ፡ ፷፻-፻፯፻-፻፶፻ ። 33ወላህሞሙ ፡ ፯፻-፻፳፻ ። 34ወአእዱግ ፡ ፯፻-፻፲፻ ። 35ወሰብእ ፡ ዘመንፈስ ፡ አንስት ፡ እለ ፡ ኢያአምራ ፡ ብእሴ ፡ ኵሉ ፡ ነፍስ ፡ ፫፻-፻፳፻ ። 36ወኮነ ፡ መንፈቀ ፡ ክፍሎሙ ፡ ለእለ ፡ ሖሩ ፡ ፅብአ ፡ እምውስተ ፡ ኍልቈ ፡ አባግዒሆሙ ፡ ፴፻-፻፫፻-፻፸፻፭፻ ። 37ወኮነ ፡ ጸባሕቱ ፡ ለእግዚአብሔር ፡ እምውስተ ፡ አባግዕ ፡ ፯፻፸፭ ። 38ወላህም ፡ ፫፻-፻፷፻ወጸባሕቱ ፡ ለእግዚአብሔር ፡ ፸ወ፪ ። 39ወአእዱግ ፡ ፫፻-፻፭፻ወጸባሕቱ ፡ ለእግዚአብሔር ፡ ፷፩ ። 40ወሰብእ ፡ ዘመንፈስ ፡ ፩፻-፻፷፻ወጸባሕቱ ፡ ለእግዚአብሔር ፡ ፴፪ ። 41ወወሀበ ፡ ሙሴ ፡ ጸባሕተ ፡ ለእግዚአብሔር ፡ ዘፈለጡ ፡ ለእግዚአብሔር ፡ ለእልዓዛር ፡ ካህን ፡ በከመ ፡ አዘዞ ፡ እግዚአብሔር ፡ ለሙሴ ። 42እምውስተ ፡ መንፈቆሙ ፡ ለደቂቀ ፡ እስራኤል ፡ ዘአውፅአ ፡ ሙሴ ፡ እምነ ፡ ዕደው ፡ እለ ፡ ሖሩ ፡ ፀብአ ፤ 43ወኮነ ፡ መንፈቅ ፡ ዘእምውስተ ፡ ትዕይንት ፡ እምነ ፡ አባግዕ ፡ ፴፻-፻[፫፻-፻፸፻] ፭፻ ። 44[ወአልህምት ፡ ፫፻-፻፷፻ ። 45ወአእዱግ ፡ ፫፻-፻፭፻ ።] 46ወሰብእ ፡ ዘመንፈስ ፡ ፩፻-፻፷፻ ። 47ወነሥአ ፡ ሙሴ ፡ እምውስተ ፡ መንፈቆሙ ፡ ለደቅቀ ፡ እስራኤል ፡ አሐደ ፡ እም፶እምነ ፡ ሰብእ ፡ ወእምነ ፡ እንስሳ ፡ ወወሀቦሙ ፡ ለሌዋውያን ፡ ለእለ ፡ የዐቅቡ ፡ ሕገ ፡ ደብተራሁ ፡ ለእግዚአብሔር ፡ በከመ ፡ አዘዞ ፡ እግዚአብሔር ፡ ለመሴ ። 48ወመጽኡ ፡ ኀበ ፡ ሙሴ ፡ ኵሎሙ ፡ እለ ፡ ሥዩማን ፡ ላዕለ ፡ ሰራዊተ ፡ ኀ ይል ፡ ነገሥተ ፡ ሰራዊት ፡ ወመሳፍንት ። 49ወይቤልዎ ፡ ለሙሴ ፡ ሰብእከ ፡ ነሥኡ ፡ ሰርጕሆሙ ፡ ለዕደው ፡ እለ ፡ ቀተሉ ፡ ምስሌነ ፡ ወኢያይድዑነ ፡ ወኢአሐዱ ፡ እምኔሆሙ ። 50ወናሁ ፡ አምጻእነ ፡ ቍርባኖ ፡ ለእግዚአብሔር ፡ ብእሲ ፡ ዘረከበ ፡ ሰርጐ ፡ ወርቅ ፡ በዝግና ፡ አው ፡ ወቅፈ ፡ አው ፡ ሕልቀተ ፡ አው ፡ ሐብለተ ፡ ዘፅፍሮ ፡ ከመ ፡ ታስተስርዩ ፡ በእንቲአነ ፡ ቅድመ ፡ እግዚአብሔር ። 51ወነሥኡ ፡ ሙሴ ፡ ወእልዓዛር ፡ ካህን ፡ ውእተ ፡ ወርቀ ፡ እምኔሆሙ ፡ ወኵሎ ፡ ሰርጐ ፡ ግቡር ። 52ወኮነ ፡ ኵሉ ፡ ወርቅ ፡ ዘመባእ ፡ ዘፈለጡ ፡ ለእግዚአብሔር ፡ ፩፻-፻፷፻፯፻፶ ፡ በሰቅል ፡ ዘእምኀበ ፡ ነገሥተ ፡ ሰራዊት ፡ ወመሳፍንት ። 53ወእልክቱሰ ፡ ዕደው ፡ እለ ፡ ፀብኡ ፡ አእተው ፡ ለለ ፡ ርእሶሙ ፡ ዘሰለቡ ። 54ወነሥኡ ፡ ሙሴ ፡ ወእልዓዛር ፡ ካህን ፡ ውእተ ፡ ወርቀ ፡ እምኀበ ፡ መላእክተ ፡ ሰራዊት ፡ ወእምኀበ ፡ መሳፍንት ፡ ወአብኡ ፡ ውስተ ፡ ደብተራ ፡ ዘመርጡል ፡ ተዝካሮሙ ፡ ለደቂቀ ፡ እስራኤል ።